奇遇：娘親、娘親，孩兒返來了！
奇遇母：奇遇，乜你咁耐至翻來呀？
奇遇：孩兒執完豬屎，到前村玩咗一陣。
奇遇母：所以你太過唔生性，你阿爹一早死咗，呢幾年你就一直執豬屎渡日，仲玩乜嘢？做完工夫，應該早啲翻嚟，幫為娘打沙至係呀。
奇遇：孩兒知錯喇，孩兒第日一定早翻嚟，娘親妳唔好再嬲。
奇遇母：算喇，我叫你去大舅父借糧食，你有冇去到呀？
奇遇：有呀！但我借唔到糧食。大舅父話：穀未舂喎。
奇遇母：咁，大舅父有冇招呼你食飯呀？
奇遇：都冇。大舅父話：今日破日不劏雞，灶冷不再坎，就叫我走喇。咁孩兒唯有到二舅父屋企。點知二舅父又話：黃昏不款客、近戌不入廚，叫我第二日再去食飯，所以我都唔敢同佢借糧。
奇遇母：唏，人窮斷六親，咁都難怪咯！我同佢哋都係同袍骨肉，估唔到佢哋當你係陌路人，以後你真係一定要生性至好呀！
奇遇：孩兒知道喇。
奇遇母：咁，你唔係今晚冇食過飯？
奇遇：唔係呀，我食過喇。因為我知道娘親今晚只有一碗米，所以孩兒就去到三舅父屋企借。
奇遇母：哎，大舅父同二舅父家中富有，都唔肯照顧我哋，三舅父咁窮，我諗唔會招呼你食飯喇。
奇遇：唔係呀娘親，佢有呀。三舅父招呼我食飯，食得好飽添呀。
奇遇母：喺？咁有啲乜嘢餸？
奇遇：秋瓜炒魚仔干，葱花雞蛋湯，仲有腐乳。
奇遇母：哎呀！個啲魚仔干，係三舅父留翻過年用，秋瓜雞蛋都係三舅母準備分娩用，不過你食咗咯，兮。
奇遇：孩兒就唔肯食，但係三舅父一定要我食，後來佢重俾我兩升米。孩兒唔肯要，但係佢一定要俾，仲話：唔係俾我，係俾娘親妳喎！所以孩兒攞咗翻嚟。
奇遇母：真係難得喇，世間上，只有窮人先至肯幫窮人，阿仔，你要記住呀！……（待續）
(大晚解密）：草根階層庭訓式之母子對答語錄，可遇難求, 百看不厭，閱之如沐春風，與有唐孟郊之《遊子吟》實未遑多讓, 願與諸君勉之。
二０二六年三月七日
130